（作者脸书，标题转贴所加）
美斯事件，中港引起轩然大波，去到日本，反应平静。日本网民宣称：其实我们欢迎的是美斯隶属的整个团队，睇波睇全局，一个球王巨星，冇可能代替全部11个队员。
对于中港盲目追外星，自己香港队一样系上场表演，备受香港人冷落，日本仔实在唔明系乜嘢心理。日本网民心平气和咁话：冇咗美斯，我哋一样欢迎。
因为即使冇美斯，人哋成对波仲有苏亚雷斯、巴塞前队友恩尼斯达，后卫阿维雷斯，全部都系高手。
过年睇贺岁片“饭戏攻心2”，据说冇咗个香港港产片楝笃笑版天王美斯。咁张继聪就顺理成章变咗苏亚雷斯擎天一柱，顶返住个场。
上集讲大佬黄子华个前女友Monica(Stephy)比二佬张继聪上咗，三弟就有另外嗰个女厨神Josephine，大佬一个人撑起成套戏。第二集冇咗子华神，就变咗群戏。同一个导演陈咏燊，好似足球队教练，又如何操返一个完全不同结构的阵容呢？
老实讲上一集黄大佬个角色都已经去到尽，所以今集安排佢去咗非洲拍摄野生动物，剩返两个细佬搞婚礼Event。邀请埋以前同父异母嘅上一代到场，交代返上代老窦老母婚外情私生活混乱生野仔的世代因缘，即系补白前传，乘机加埋胡枫、罗兰、米雪、黎彼得成班甘草？出场做后卫，中间搭多一个中场谢君豪，而原班男女打前锋，完全以另类喜剧形象出现，加?加料变成一直盆菜贺岁宴，咁嘅Menu，识得咁样执生，热闹缤纷，戏未到一半已经成功，令观众唔记得咗黄子华的不存在，亦都好聪明。
班前辈到场出席婚礼，果然冇令人失望，尤其罗兰坐轮椅到场嗰段Gag扭笑位甚劲。而事隔一年，张继聪在上集俾大佬压住，个角色天生有自卑感，今次终于出头，亦另见演技系可以混合郑中基同少少港产片戆豆先生的新路向，将来亦有发挥前途。
而Stephy做的那个女文青变身保育创意产业话事人，喺上一集气势拍得住郑秀文，今集以前大嫂的姿态出现，更加有两分梅丽史翠普嘅成熟气场。
至于王苑之在今集亦成功变身阿姐级，主持另一条“仙鹤神针”煮饭线，开埋精品饮食综艺节目嗰条路，成套戏乱中有序，加返条隐线，添加色香味。
上集系讲一个家庭三兄弟争论卖楼离开，高潮戏的一场饭局，食食吓饭，两兄弟发现情欲错配真相，愤怒反台。黄子华就离开咗嘞，今集就讲留下来的，到底喺香港点样自处？上一集“离”，今集讲“合”；上集喜中有愁，续集喜中有乐。
两年以来选择离开咗香港的BNO与海外港人，可以在续集中见到香港尖沙咀维港新冠后解封最新景色状态，高楼大厦一样，个灵魂仲剩返几多？
最估唔到系用青春新进女星廖子妤，做返张继聪个亡母，在现实年龄中应该系两父女，戏中母子跨时空幻觉相遇，一啲都唔觉得突兀。
见到今日香港体育界备受欺凌，香港足球又惨遭边缘化，气氛极度畸形，香港电影在种种压抑之下点样苦中作乐？留低的香港人又可以点呢？尤其系有啲知识专业技能嘅下一代。所以在海外睇返饭戏攻心2，就在喜乐之外，喺温哥华伦敦曼彻斯特睇返银幕上香港进入“美斯大仇恨时代”嘅维港山海，百感交集，就必有各自嘅弦外之哀了。
